Friday, 8 September 2017

النسخة الرابعة: معك ٥٠٠ دينار زيادة


#ثلاثون_يوماً_من_السعادة #BocelliJO

النسخة الرابعة: "معك ٥٠٠ دينار زيادة؟" :)

في تجربة اجتماعية فريدة من نوعها، سألتُ مجموعةً من الأشخاص(*) من محيطي سؤالاً بسيطاً: "معك خمسمائة دينار زيادة؟". الهدف الحقيقي كان: "تتبرع لي فيهم أحضر حفلة "أندريا بوتشيلّي" (مغنّ أوبرالي إيطالي) القادمة في الأردن!" 😁 كانت الإجابات وردود الفعل كالتالي :)
-------
- ديانا: "معك ٥٠٠ دينار زيادة؟".
- الشخص ١: "ليش؟".
- ديانا: "تتبرع لي فيهم أحضر حفلة أندريا بوتشيلّي".
- الشخص ١: "عالشخص ٥٠٠؟ يعني عالشخصين ١٠٠٠ دينار؟ أي بزيد عليهم ١٠٠٠ دينار، بحُطهم مهر وبتزوّج". 😁
-------
- الشخص ٢: "طب ببعتِك تحضري حفلة لبافاروتّي - الله يرحمه - بتطلع أرخص". 😁
-------
- الشخص ٣: "التذكرة بـ٥٠٠ يعني هاي حفلة برجوازية. لسة بدنا نشتري توكسيدو ولبس مرتّب نحضر فيه الحفلة، ولازم نروح على الصالون يومها، وأكيد نوصل المسرح بليموزين. يعني هي كمان شغلة ١٠٠٠ دينار فوقهم. طيب نشتري سيارة بدل هالقصة أحسن؟". 😁
-------
- الشخص ٤: "طب نروح نقعد على السور فوق ونحضرها ببلاش؟". 😁
-------
- الشخص ٥: *لا رد*.
-------
- الشخص ٦: "٥٠٠ دينار؟ ولك إنتِ كبيرك شيرين! هي تذكرتها بـ٣٠ ليرة آخر درجة!". 😁
-------
- الشخص ٧: "كل هذا مشان يشوفِك شقفة مطرب؟!".
- ديانا: "لا هو ضرير؛ يعني حتى ما رح يشوفني".
- الشخص ٧: "كمان!!".
-------
- الشخص ٨: "شو؟ ٥٠ ليرة؟! على شو ٥٠ ليرة بالله؟!".
- ديانا: "٥٠٠ مو خمسين".
- الشخص ٨: "#$&*+*@+&".
-------
- الشخص ٩: "على شو ٥٠٠ ليرة؟! أي عندي بالبيت شاشة قد الأردن، وساوند سيستم خرافي؛ بنشغّل هالأغاني وبنجيب كم باكيت شيبس وبنسمع ولا بتكلّفنا ٥ دنانير". 😁
-------
- ديانا: "إلك ولّا للديب؟".
- الشخص ١٠: "شو فيه؟".
- ديانا: "معك ٥٠٠ دينار زيادة؟".
- الشخص ١٠: "له يا ديانا! ١٠٠٠ دينار إلك! بس إن شاء الله كله بخير ومو صاير معك إشي؟".
- ديانا: "والله تمام؛ بس لازميننّي حتى أحضر حفلة أندريا بوتشيلّي".
- الشخص ١٠: "******". 
-------
- ديانا (مخاطبةً حدا إيطالي جد والله): "مش إنت إيطالي؟ هل بتعتقد إنه ممكن أندريا بوتشيلّي يكون بقرب لك؟ لإنه جاي على الأردن وإذا بيعطيك تذكرة إلي بكون ممتاز!".
- الشخص ١١ (الإيطالي جد والله): طلع بإجازة وما رد علي لسة. 😁
-------
(*): الأشخاص = ذكوراً/إناثاً. الإجابات مَروِيّة بتصرُّف.
-------
التجارب الاجتماعية الطريفة تبعث على السعادة :)

0 comments :

Post a Comment