عدم التزام - واحد من اثنين

اليوم رُحت أصدر شهادة عدم التزام من القيادة العامة للقوات المسلحة - مديرية شؤون الأفراد (بالعربي: إنه ما علي خدمة علم؛ مع إني بنت والخدمة للذكور حصراً. بس ما علينا 😂). المهم، بعد ما تسلقت أعلى قمم طبربور العتيدة للوصول للمبنى التاريخي للقيادة، بادرني كل عمّو بصادفه بنظرة استهجان إنه ما فيه هيك ورقة للبنات. بعدين عمّو ابن حلال بده يخلص من المأزق حكى لي: "والله عنا ما فيه هيك ورقة، هاي بتطلعيها من التعبئة".

أنا - ناظرةً إلى الكمية المهولة من النماذج المعنونة بـ(طلب عدم التزام) الموضوعة أمامه - حكيت له: "بس أنا تأكدت إنها تابعة لشؤون الأفراد مش للتعبئة. بصير أعبّي النموذج اللي قدّامك؟".

- العمّو: "هدول للشباب، بس خليني أشوف شو ممكن أعمل".

ووالله هالعمّو طلع خدوم، طلّع هالتلفون واتصل كم تلفون وكل شوي استهجان إنه "يا رجل، هيك بنفع؟!" وهيكا، حتى بالآخر سلّم للأمر الواقع وقال لي: "هٙي نموذج بتروحي تجمعي أختام من كذا وكذا وكذا (دوائر عامة) وبترجعي بنصدر لك الشهادة".

شكرته وانطلقت للمديرية العامة للدفاع المدني لتحصيل الختم الأول. بعد نفس قصة الاستهجان أعلاه (زائد إنه مستحيل تلاقي مكان تصُف السيارة هناك) وصلت مكتب خدمة الجمهور وكان فيه ٣ عمّوهات منهم ٢ معنيين بالموضوع.

- العمّو الأول: "تفضلي".

- أنا: "بحتاج ختمكم على هذا النموذج لإثبات إنه ما علي خدمة علم أو التزام مع القوات المسلحة".

- العمّو الأول: "حتى البنات صار بلزمها تصدر هالورقة؟ ما إنتو ما عليكم خدمة أصلاً! أعطيني الرقم الوطني نطلعه على الكمبيوتر".

- العمّو الثاني: "يا رجل! ما البنات ما عليها خدمة! اكتب "لا يوجد" واختم لها إياها. على شو بدك تدوّر!". 😂

- أنا: (ماي داي إز توتالي مايد)! 😂😂😂 (بس إنه طبعاً ما حكيت هيك). 💃💃💃 #لا_فائدة_مرجوّة_من_هذا_المنشور #طويل_على_الفاضي

الجزء الثاني: عدم التزام - اثنان من اثنين