إضراب الأردن.. فخر الأردن

بحب من الـCalculus فكرة الـlocal maximum والـglobal maximum: القيمة العظمى المحلية (أكبر قيمة للاقتران ضمن جزء معين من نطاقه)، والقيمة العظمى المطلقة (أكبر قيمة للاقتران ضمن نطاقه الكامل).

اللي صار بالأردن خلال الفترة الأخيرة كان بنظري قيمة عظمى محلية ولو كان طموحنا وسعينا بضل دائماً صوب القيمة العظمى المطلقة.

من حقنا كشعب أردني نفخر إنه خلال ٩ أيام، ٩ أيام فقط، تمكنّا من إسقاط حكومة ما كان مطلبنا الأساسي إسقاطها، ومن سحب قانون ضريبي جائر وقائم على الجباية من كل الشعب حتى اللي ما معه ياكل.

شعور إنك تستخدم صوتك لتطلب حقك وتحكي للغلط غلط بعينه شعور بحد ذاته مفرح وعظيم ومبهج! الشعور إنه الصوت انسمع وصار فيه بوادر لتصحيح الغلط شعور أحلى وأعظم وأكثر إبهاجاً! :)

من حقنا نفخر بإنجازنا وببلدنا الأردن. كنّا أوعى من ما كنّا نفسنا مفكرين؛ اعتصامات وإضرابات تمّت بدون ولا نقطة دم، ركّزنا على مطلبنا المشترك بدون ما نسمع "أردني/فلسطيني"، "شمالي/جنوبي"، "مسلم/مسيحي"، "إخواني/شيوعي"، "برشلوني/مدريدي"! حتى لمّا هدّدونا إنه ما فيه رواتب، وقالوا ٤٩٪ من الحراك من سوريا، ضل وعينا وتركيزنا أكبر من كل محاولات التشتيت.

عمّان كانت أحلى بهالفترة؛ من أحلى المواقف بالنسبة إلي لما زميل هندي في زيارة لعمّان حكى لي "أنا عمري ما شفت كمية شرطة قد اللي شفتها بشارع زهران يوم الجمعة الماضي؛ لكن الأمور كانت منضبطة والشعب ملتزم وما شعرت للحظة بالخوف!". ما فيه بلد حذّر رعاياه من زيارة الأردن، ما حدا فينا خاف، البلاد اللي حولنا (اللي البعض بخوّفنا إنّا لو طلعنا نحكي "رح يصير فينا زي ما صار فيهم") تحدثت بفخر عن الصورة الحضارية اللي عكسها الأردن وشعبه اللي أثبت أنّ الحقوق تُنتزع والصوت يُمكن سماعه!

فخورة ببلدنا وبشبابنا وبوعينا وبتمنى يستمر: الشباب اللي اعتصمت وأضربت، المغتربين اللي شمّوا ريحة البلد وسمعوا صوتها بكل مكان، نشاطنا على الـsocial media ومعرفتنا إيمتى ببطّل يكون نقل أخبار وتعليق على الأحداث وببلّش يصير شغل تسخيف وshow off وأوه لا لا. حتى كتابتنا باللهجة الأردنية مش بالفصحى ومش بالإنجليزي! كله بيفرق.

من واجبنا نحكي عن الإيجابيات اللي صارت زي ما حكينا عن السلبيات ووجّهنا النقد. 

ولو ضل كتير منا لسة بيحكوا اللي صار "كله تمثيلية"، "لسة مطولين"، و"مضحوك علينا"؛ فيمكن تطلع القصة جد هيك! والعين الناقدة مش لازم تنام، ولازم نضل صاحيين. لكن كمان بجي فيها، بذات الوعي اللي حرّكنا، إنا نفخر بتحقيق أحد مطالبنا ونبلّش أول خطوة بالطريق ونسعى كلنا مع بعض لنوصل للقيمة العظمى المطلقة، يوماً ما!🇯🇴 #حب_الأردن #فخر_الأردن #إضراب_الأردن